- Project Runeberg -  Nova analysis aquarum Medeviensium /
Nova analysis aquarum Medeviensium

(1800) [MARC] [MARC] Author: Jöns Jacob Berzelius
Table of Contents / Innehåll | << Previous | Next >>
  Project Runeberg | Catalog | Recent Changes | Donate | Comments? |   
3

NOVA ANALYSIS AQUARUM MEDEVIENSIUM

Aquæ Medevienses a Cel. BERGMAN primum justa & consummata analysi chemica exploratæ sunt. In actis Reg. Acad. Scient. Holm. An. 1783. P. 4, p. 218, hanc suam disquisitionem exposuit. Sed Cel. Medicus S. R. M. Primarius etc. D. Doct. S. HEDIN, hujus institutionis præfenti tempore curator (Brunns Intendent,) cum variare interdum naturam fontium & elementorum rationem, assiduis nobilissimorum chemicorum investigationibus confirmatum esse, & in recentissimis præterea chemiæ profectibus majora ad disquisitiones hujus generis subtilius instituendas subsidia esse posita reputaverit, æstate superiori novam analysin suscipiendam esse censuit; eamque mihi, ad Medevi vices Chirurgi, ejus auspicio, tunc gerenti, mandavit. Quam cura diligentiaque quanta maxima potuerim peractam, propter magnam ab experientia summi viri discrepantiam, eorum. qui his rebus student, judicio esse submittendam existimavi. Et cum etjam celebratum Loka fontem limumque, antea rite consummateque non examinatum, eadem hac præterita æstate, ab ejus curatore D:o Doct. etc. ASCHAN sollicitatus, adcurate sim perscrutatus, brevem ejus descriptionem, reservata in aliam occasionem copiosiori experimentorum expositione, adjungere, ob materiæ similitudinem, institui.

Ex tribus fontibus, quibus jam uti licet, unus tantum, & is infimus, ante nostram ætatem scaturivit. Olim quidem tres etjam numero fuerunt fontes; duo autem reliqui, quos Cel. BERGMAN Rödbrunn & Dahlbrunn appellat, jam
4
ita cessaverunt, ut ne locum quidem ubi siti fuerint, reperire potuerim. At curante Cel. HEDIN alii duo nuper aperti sunt & ædiculis belle superstructis hoc anno consummatis, tecti; ut pauperibus usui essent, quibus antea circa horam tertiam matutinam surgendi, necessitas erat, ne ex unica scaturigine petita aqua opulentioribus ad horam sextam fontem adeuntibus deesset.


The above contents can be inspected in scanned images: 3, 4

Project Runeberg, Wed Sep 3 22:05:50 2003 (aronsson) (diff) (history) (download) << Previous Next >>
https://runeberg.org/berzaqua/01.html

Valid HTML 4.0! All our files are DRM-free