Full resolution (TIFF) - On this page / på denna sida - I. N. J. Oratio, habita in Conventu Synodali Aboæ d. 15 Sept. 1775
<< prev. page << föreg. sida << >> nästa sida >> next page >>
Below is the raw OCR text
from the above scanned image.
Do you see an error? Proofread the page now!
Här nedan syns maskintolkade texten från faksimilbilden ovan.
Ser du något fel? Korrekturläs sidan nu!
This page has been proofread at least once.
(diff)
(history)
Denna sida har korrekturlästs minst en gång.
(skillnad)
(historik)
regionis statum sub Paganismo et Papismo exponit. Demum
perhibet, hane versionem fuisse factam in ædibus divi
Laurentii, quo nomine itaque schola vetus, ubi jam est
Academiæ laboratorium chemicum et theatrum anatomicum, illo
tempore veniebat. Mentionem simul facit filii sui Christiani,
qui postea Episcopatui Esthoniæ admovebatur, quem vero hinc
colligimus scholam Aboënsem frequentasse, cum hujus
translationis Psalterii ibi primæ ducerentur lineæ.
Eodem anno et loco, per indefessam curam Agricolæ,
typographiam relinquebant partes aliquæ e Mose et Prophetis
collectæ: „Veisut ja ennustoxet Mosesen Laista ja Prophetista
uloshaetut". Præfatio versibus Finnicis consignata suadet, quod
quamdiu paupertas obstabat editioni integrorum Bibliorum,
medulla Scripturæ contentos esse deceat, indeque, ut apes e
floribus mel comportant, nutrimentum animabus colligere.
Tres postremi minores Prophetæ sequenti anno 1552 ex
eadem typographia, cura Agricolæ, habitu Finnico prodierunt,
una cum doctrina Mosaica de gradibus prohibitis,
benedictione quoque et maledictione. Antecedit prolixior præfatio
metrica, de spiritualibus et temporalibus beneficiis Divinis,
addita ad eorum genuinum et gratum usum exhortatione.
Sed his rivulis extingui non potuit sitis incolarum,
integrorum Bibliorum in linguam suam maternam translationem
summopere desiderantium, ad quod opus pium promovendum
Clerus Finnicus in Synodo certas mensuras frumenti annuatim
pendendas obtulit. Demum in comitiis Holmensibus 1636 his
desideriis Status Regni annuerunt, et datæ sunt d. 10 Aprilis
1638 Regiæ Litteræ ad Episcopum Rothovium de isto negotio,
ut nimirum versio Finnica S:æ Scripturæ, per viros ad id
negotium idoneos, quos denominaverat Consistorium, propediem
adornaretur, et ope typographica in publicum prodiret. Illa
vero translationis sanciebatur lex, ut in iis omnibus, quæ vel
privato quorundam labore jam erant versa, vel eorum opera
vertenda, linguas originales et Lutheri postremam versionem
consulerent, utque simul puritatem Stili Finnici sectarentur,
ita ut simili filo decurreret tota versio, et in omnibus
provinciis probe intelligi posset. Director operis, sub inspectione
Episcopi, constituebatur Archipræpositus Aeschillus Petræus,
versores vero Mag. Martinus Stodius, Lector Gymnasii
<< prev. page << föreg. sida << >> nästa sida >> next page >>
