Full resolution (JPEG)
- On this page / på denna sida
- Hér hefr upp sǫgu Óláfs konungs Tryggvasonar
<< prev. page << föreg. sida << >> nästa sida >> next page >>
Below is the raw OCR text
from the above scanned image.
Do you see an error? Proofread the page now!
Här nedan syns maskintolkade texten från faksimilbilden ovan.
Ser du något fel? Korrekturläs sidan nu!
This page has been proofread at least once.
(diff)
(history)
Denna sida har korrekturlästs minst en gång.
(skillnad)
(historik)
at firðir ii. ganga í landit, sínum megin landz hvárr, en milli
fjarðarbotna hǫfðu Danir gǫrt borgarvegg mikinn af grjóti ok
torfi ok viðum ok grafit díki breitt ok djúpt fyrir utan, en
kastalar fyrir borgarhliðum. Þá varð orrosta mikil; þess getr
í Velleklu:
133. Vasat í gǫgn, þótt gerði
garðrǫgnir styr harðan,
gengiligt at ganga,
geirrásar, her þeira,
þás með fylki Frísa
fór gunnviðurr sunnan
(kvaddi vígs) ok Venda
(vágs blakriði) Frakka.
Hákon jarl setti fylkingar yfir ǫll borgarhlið, en hitt var þó
meiri hlutr liðs, er hann lét fara alt með borgarveggjunum ok
verja þar, sem helzt var at sótt; fell þar mart af keisarans liði,
en þeir fengu ekki unnit at borginni. Snýr þá keisari í brot ok
leitaði þar ekki lengr til; svá segir í Velleklu:
134. Þrymr varð logs, þars lǫgðu
leikmiðjungar, Þriðja,
(arngreddir varð) odda
(andvígr) saman randir;
sundfaxa kom Sǫxum
sœkiþróttr á flótta,
þar svát gramr með gumnum
garð yrþjóðum varði.
Eptir þessa orrostu fór Hákon jarl aptr til skipa sinna ok ætlaði
þá at sigla norðr aptr í Nóreg, en honum gaf eigi byr; lá hann
þá út i Limafirði.
K. 27. Skírðr Haraldr konungr Gormsson ok Hákon jarl.
Ótta keisari snýr þá her sínum til Slés, dregr hann þar at
sér skipaher, flytr þar liðit yfir fjǫrðinn á Jótland. En er þat
spyrr Haraldr Dana-konungr, þá ferr hann i móti með sinn her,
ok verðr þar orrosta mikil, ok at lykðum fær keisari sigr, en
Dana-konungr flýði undan til Limafjarðar ok fór út í Mársey;
fóru þá menn milli þeira konungs ok var komit griðum á ok
stefnulagi. Fundusk þeir Ótta keisari ok Dana-konungr í
Mársey. En þá boðaði Poppó, byskup heilagr, trú fyrir Haraldi
konungi ok hann bar glóanda járn í hendi sér ok sýndi Haraldi
konungi hǫnd sína óbrunna. Síðan lét Haraldr konungr skírask
með allan Dana-her. Haraldr konungr hafði áðr orð send Hákoni
jarli, þá er konungr sat í Mársey, at jarl skyldi koma til liðveizlu
við hann; var jarl þá kominn til eyjarinnar, er konungr hafði
skírask látit; sendir þá konungr orð, at jarl skyldi koma til
fundar við hann. En er þeir hittask, þá nauðgar konungr jarli
til at láta skírask; var þá Hákon jarl skírðr ok þeir menn allir,
er þar fylgðu honum. Fekk þá konungr í hendr honum presta ok
<< prev. page << föreg. sida << >> nästa sida >> next page >>
Project Runeberg, Sun Dec 10 06:24:58 2023
(aronsson)
(diff)
(history)
(download)
<< Previous
Next >>
https://runeberg.org/heimskring/0132.html
