- Project Runeberg -  Heimskringla. Nóregs Konunga Sogur /
140

(1911) [MARC] Author: Snorri Sturluson With: Finnur Jónsson
Table of Contents / Innehåll | << Previous | Next >>
  Project Runeberg | Catalog | Recent Changes | Donate | Comments? |   

Full resolution (JPEG) - On this page / på denna sida - Hér hefr upp sǫgu Óláfs konungs Tryggvasonar

scanned image

<< prev. page << föreg. sida <<     >> nästa sida >> next page >>


Below is the raw OCR text from the above scanned image. Do you see an error? Proofread the page now!
Här nedan syns maskintolkade texten från faksimilbilden ovan. Ser du något fel? Korrekturläs sidan nu!

This page has been proofread at least once. (diff) (history)
Denna sida har korrekturlästs minst en gång. (skillnad) (historik)

upp ørendi sín; Ormr bað þá fyrst fara til náttverðar; en áðr
þrælar hǫfðu matazk, þá váru komnir til Orms margir menn
ór byggðinni, er hann hafði orð sent; lét Ormr þá engan kost,
at Guðrún fœri með þrælunum. Guðrún mælti, bað þræla svá
segja jarli, at hon myndi eigi til hans koma, nema hann sendi
eptir henni Þóru af Rimul; hon var húsfreyja rík ok ein af
unnostum jarls. Þrælarnir segja, at þeir skulu þar svá koma
ǫðru sinni, at bóndi ok húsfreyja munu þessa iðrask skambragz,
ok heitask þrælarnir mjǫk ok fara brot síðan. En Ormr lét fara
herǫr fjogurra vegna um byggðina ok lét þat boði fylgja, at
allir skyldu með vápnum fara at Hákonijarli ok drepa hann,
ok sendi til Haldórs á Skerðingssteðju, en Haldórr lét þegar
fara herǫr. Lítlu áðr hafði jarl tekit konu mannz þess, er
Brynjólfr hét, ok var þat verk allmjǫk óþokkat, ok var þá við
sjálft, at herr myndi upp hlaupa. Eptir ǫrboði hljóp upp múgi
mannz ok sótti til Meðalhúsa. En jarl fekk njósn ok fór af
bœnum með lið sitt ok í dal djúpan, þann er nú er kallaðr
Jarlsdalr síðan, ok leyndusk þeir þar. Eptir um daginn hafði
jarl njósn alt af bóndaherinum. Bœndr tóku vegu alla ok ætluðu
helzt, at jarl myndi hafa farit til skipa sinna, en fyrir skipunum
réð þá Erlendr, sonr hans, inn mannvænsti maðr. En er náttaði,
dreifði jarl liðinu ok bað fara markleiði út til Orkadals, — »engi
maðr mun yðr mein gera, ef ek em hvergi í nánd; gerið orð
Erlendi, at hann fari út eptir firðinum, ok hittumk vit á Mœri.
Ek mun vel fá leynt mér fyrir bóndum«. Fór jarl þá ok þræll
hans með honum, er Karkr er nefndr; íss var á Gaul, ok hratt
jarl þar í hesti sínum ok þar lét hann eptir mǫttul sinn, en
þeir fóru í helli þann, er síðan er kallaðr Jarlshellir. Þá sofnuðu
þeir, en er Karkr vaknaði, þá segir hann draum sinn, at maðr
svartr ok illiligr fór hjá hellinum ok hræddisk hann þat, at hann
myndi inn ganga, en sá maðr sagði honum, at Ulli var dauðr.
Jarl segir, at Erlendr myndi drepinn. Enn sofnar Þormóðr karkr
ǫðru sinni ok lætr illa í svefni; en er hann vaknar, segir hann
draum sinn, at hann sá þá inn sama mann fara ofan aptr ok bað
þá segja jarli, at þá váru lokin sund ǫll. Karkr segir jarli
drauminn; hann grunaði, at slíkt myndi vera fyrir skamlífi hans.
Síðan stóð hann upp, ok gengu þeir á bœinn Rimul; þá sendi jarl
Kark á fund Þóru, bað hana koma leyniliga til sín; hon gerði
svá ok fagnar vel jarli. Jarl bað hana fela sik um nǫkkurra nátta
sakir, þar til er bœndr ryfi samnaðinn. »Hér mun þín leitat,

<< prev. page << föreg. sida <<     >> nästa sida >> next page >>


Project Runeberg, Sun Dec 10 06:24:58 2023 (aronsson) (diff) (history) (download) << Previous Next >>
https://runeberg.org/heimskring/0150.html

Valid HTML 4.0! All our files are DRM-free