Full resolution (JPEG) - On this page / på denna sida - Hér hefr upp sǫgu Óláfs konungs Tryggvasonar
<< prev. page << föreg. sida << >> nästa sida >> next page >>
Below is the raw OCR text
from the above scanned image.
Do you see an error? Proofread the page now!
Här nedan syns maskintolkade texten från faksimilbilden ovan.
Ser du något fel? Korrekturläs sidan nu!
This page has been proofread at least once.
(diff)
(history)
Denna sida har korrekturlästs minst en gång.
(skillnad)
(historik)
»Eigi« segir Karkr. »Vit várum fœddir á einni nótt, segir jarl,
skamt mun ok verða milli dauða okkars«. Þá fór Óláfr konungr
á brot, er kveldaði; en er náttaði, þá helt jarl vǫku yfir sér, en
Karkr sofnaði ok lét illiliga. Þá vakði jarl hann ok spurði, hvat
hann dreymði. Hann segir: »ek var nú á Hlǫðum ok lagði Óláfr
Tryggvason gullmen á háls mér«. Jarl svarar: »þar mun Óláfr
láta hring blóðrauðan um háls þér, ef þú finnr hann; vara þú þik
svá, en af mér muntu gott hljóta, svá sem fyrr hefir verit, ok
svik mik eigi«. Síðan vǫkðu þeir báðir, svá sem hvárr vekði
yfir ǫðrum, en í móti degi þá sofnaði jarl ok brátt lét hann illa,
ok svá mikit varð at því, at jarl skaut undir sik hælunum ok
hnakkanum, svá sem hann myndi vilja upp rísa, ok lét hátt ok
ógurliga. En Karkr varð hræddr ok felmsfullr ok greip kníf
mikinn af linda sér ok skaut gǫgnum barka jarli ok skar út ór.
Þat var bani Hákonar jarls. Síðan sneið Karkr hǫfuð af jarli
ok hljóp í brot ok kom eptir um daginn inn á Hlaðir ok fœrði
hǫfuð jarls Óláfi konungi; hann segir ok þá þessa atburði um
ferðir þeira Hákonar jarls, sem nú er áðr ritit. Síðan lét Óláfr
konungr leiða hann í brot ok hǫggva hǫfuð af.
K. 50. Grýting hǫfuðs Hákonar jarls.
Þá fór Óláfr konungr ok fjǫlði bónda með honum út til
Niðarhólms ok hafði með sér hǫfuð Hákonar jarls ok Karks. Sá
hólmr var þá hafðr til þess, at drepa þar þjófa ok illmenni, ok
stóð þar gálgi, ok lét hann þar til bera hǫfuð Hákonar jarls ok
Karks. Gekk þá til allr herrinn ok œepði upp ok grýtti þar at ok
mæltu, at þar skyldi níðingr fara með ǫðrum níðingum. Síðan
láta þeir fara upp í Gaulardal ok taka þar búkinn ok drógu í brot
ok brendu. Varð hér svá mikill máttr at fjándskap þessum, er
Þrœndir gerðu til Hákonar jarls, at engi maðr mátti nefna hann
annan veg, en jarl inn illa; var þetta kall haft lengi síðan. En
hitt er satt at segja frá Hákoni jarli, at hann hafði marga hluti
til þess at vera hǫfðingi, fyrst kynkvíslir stórar, þar með speki
ok kœnleik at fara með ríkdóminum, rǫskleik í orrostum ok þar
með hamingjuna at vega sigrinn ok drepa fjándmennina; svá
segir Þorleifr Rauðfeldarson:
153. Hákon, vitum hvergi
(hafizk hefr runnr af gunni)
fremra jarl und ferli
(folkránar) þér mána;
þú hefr ǫðlinga Óðni
(etr hrafn af ná getnum),
vesa mátt af því vísi
víðlendr, níu senda.
<< prev. page << föreg. sida << >> nästa sida >> next page >>
