Full resolution (JPEG)
- On this page / på denna sida
- Hér hefr upp sǫgu Óláfs konungs Tryggvasonar
<< prev. page << föreg. sida << >> nästa sida >> next page >>
Below is the raw OCR text
from the above scanned image.
Do you see an error? Proofread the page now!
Här nedan syns maskintolkade texten från faksimilbilden ovan.
Ser du något fel? Korrekturläs sidan nu!
This page has been proofread at least once.
(diff)
(history)
Denna sida har korrekturlästs minst en gång.
(skillnad)
(historik)
164. Út bauð jǫfra hneitir
élmóðr af Sviþjóðu
(sunnr helt gramr til gunnar)
gunnbliks liði miklu;
hverr vildi þá hǫlða
hrægeitunga feitir,
(mǫ́r fekk) á sæ (sára
sylg) Eireki fylgja.
Þeir Svía-konungr ok Eiríkr jarl heldu til fundar við
Danakonung ok hǫfðu þá allir saman ógrynni hers.
K. 99. Svikræði Sigvalda jarls.
Sveinn konungr, þá er hann hafði sent eptir herinum, þá
sendi hann Sigvalda jarl til Vindlandz at njósna um ferð Óláfs
konungs Tryggvasonar ok gildra svá til, at fundr þeira Sveins
konungs mætti verða ok Óláfs konungs. Ferr þá Sigvaldi jarl
leið sína ok kom fram á Vindlandi, fór til Jómsborgar ok síðan á
fund Óláfs konungs Tryggvasonar. Váru þar mikil vináttumál
þeira á milli, kom jarl sér í inn mesta kærleik við konung. Ástríðr,
kona jarls, dóttir Búrizláfs konungs, var vin mikill Óláfs konungs,
ok var þat mjǫk af inum fyrrum tengðum, er Óláfr konungr hafði
átt Geiru, systur hennar. Sigvaldi jarl var maðr vitr ok ráðugr,
en er hann kom sér í ráðagørð við Óláf konung, þá dvalði hann
mjǫk ferðina hans austan at sigla ok fann til þess mjǫk ýmsa
hluti, en lið Óláfs konungs lét geysiilla ok váru menninir mjǫk
heimfúsir, er þeir lágu albúnir, en veðr byrvæn. Sigvaldi jarl
fekk njósn leyniliga af Danmǫrk, at þá var austan kominn herr
Dana-konungs ok Eiríkr jarl hafði þá ok búinn sinn her ok þeir
hǫfðingjarnir mundu þá koma austr undir Vindland ok þeir hǫfðu
á kveðit, at þeir mundu bíða Óláfs konungs við ey þá, er Svǫlð
hét, svá þat, at jarl skyldi svá til stilla, at þeir mætti þar finna
Óláf konung.
K. 100. Ferð Óláfs af Vindlandi.
Þá kom pati nǫkkurr til Vindlandz, at Sveinn Dana-konungr
hefði her úti, ok gerðisk brátt sá kurr, at Sveinn Dana-konungr
myndi vilja finna Óláf konung, en Sigvaldi jarl segir konungi:
»ekki er þat ráð Sveins konungs at leggja til bardaga við þik með
Dana-her einn saman, svá mikinn her sem þér hafið. En ef yðr
er nǫkkurr grunr á því, at ófriðr myni fyrir, þá skal ek fylgja
yðr meðð mínu liði, ok þótti þat enn styrkr, hvar sem Jómsvíkingar
fylgðu hǫfðingjum; mun ek fá þér xi. skip vel skipuð«. Konungr
játaði þessu. Var þá lítit veðr ok hagstœtt. Lét konungr þá
leysa flotann ok blása til brotlǫgu; drógu menn þá segl sín, ok
<< prev. page << föreg. sida << >> nästa sida >> next page >>
Project Runeberg, Sun Dec 10 06:24:58 2023
(aronsson)
(diff)
(history)
(download)
<< Previous
Next >>
https://runeberg.org/heimskring/0182.html
