Full resolution (JPEG)
- On this page / på denna sida
- Hér hefr upp sǫgu Óláfs konungs Tryggvasonar
<< prev. page << föreg. sida << >> nästa sida >> next page >>
Below is the raw OCR text
from the above scanned image.
Do you see an error? Proofread the page now!
Här nedan syns maskintolkade texten från faksimilbilden ovan.
Ser du något fel? Korrekturläs sidan nu!
This page has been proofread at least once.
(diff)
(history)
Denna sida har korrekturlästs minst en gång.
(skillnad)
(historik)
En er þeir sá þat, þá báðu þeir konunginn sigla leið sína, en
leggja eigi til orrostu við svá mikinn her. Konungr svarar hátt
ok stóð upp í lyptingunni: »láti ofan seglit, ekki skulu mínir
menn hyggja á flótta; ek hefi aldri flýit í orrostu; ráði guð
fyrir lífi mínu, en aldri mun ek á flótta leggja«. Var svá gǫrt,
sem konungr mælti. Svá segir Hallfrøðr:
166. Geta skal máls þess, es mæla
menn at vápna sennu
dolga fangs við drengi
dáðǫflgan bǫr kvǫ́ðu —
baða hertryggðar hyggja
hnekkir sína rekka
(þess lifa þjóðar sessa
þróttar orð) á flótta.
K. 103. Lagt saman skipum Óláfs konungs.
Óláfr konungr lét blása til samlǫgu ǫllum skipum sínum;
var konungsskip í miðju liði, en þar á annat borð Ormr inn
skammi, en annat borð Traninn. En þá er þeir tóku at tengja
stafnana, þá bundu þeir saman stafnana á Orminum langa ok
Orminum skamma. En er konungr sá þat, kallaði hann hátt,
bað þá leggja fram betr it mikla skipit ok láta þat eigi aptast
vera allra skipa í herinum. Þá svarar Úlfr inn rauði: »ef Orminn
skal því lengra fram leggja, sem hann er lengri en ǫnnur skip,
þá mun ávint verða um sǫxin«. Konungr segir: »eigi vissa
ek, at ek ætta stafnbúann bæði rauðan ok ragan«. Úlfr segir:
»ver þú eigi meirr baki lyptingina en ek mun verja stafninn«.
Konungr helt á boga ok lagði ǫr á streng ok snøri at Úlfi. Úlfr
mælti: »skjót annan veg, konungr, þannug sem meiri er þǫrfin;
þér vinn ek þat er ek vinn«.
K. 104. Frá Óláfi konungi.
Óláfr konungr stóð í lypting á Orminum, bar hann hátt
mjǫk; hann hafði gyltan skjǫld ok gullroðinn hjálm; var hann
auðkendr frá ǫðrum mǫnnum; hann hafði rauðan kyrtil stuttan
útan um brynju. En er Óláfr konungr sá, at riðluðusk
flokkarnir ok upp váru sett merki fyrir hǫfðingjum, þá spurði
hann: »hverr er hǫfðingi fyrir líði því, er gegnt oss er?«.
Honum var sagt, at þar var Sveinn konungr tjúguskegg með
Dana-her. Konungr svarar: »ekki hræðumk vér bleyður þær,
engi er hugr í Dǫnum; — en hverr hǫfðingi fylgir þeim
merkjum, er þar eru út í frá hœgra veg?«. Honum var sagt,
at þar var Óláfr konungr með Svía-her. Óláfr konungr segir:
»betra væri Svíum heima ok sleikja um blótbolla sína, en ganga
<< prev. page << föreg. sida << >> nästa sida >> next page >>
Project Runeberg, Sun Dec 10 06:24:58 2023
(aronsson)
(diff)
(history)
(download)
<< Previous
Next >>
https://runeberg.org/heimskring/0185.html
