176 (Heimskringla. Nóregs Konunga Sogur)

Full resolution (JPEG) - On this page / på denna sida - Hér hefr upp sǫgu Óláfs konungs Tryggvasonar

scanned image

<< prev. page << föreg. sida << >> nästa sida >> next page >>

Below is the raw OCR text from the above scanned image. Do you see an error? Proofread the page now!
Här nedan syns maskintolkade texten från faksimilbilden ovan. Ser du något fel? Korrekturläs sidan nu!

This page has been proofread at least once. (diff) (history)
Denna sida har korrekturlästs minst en gång. (skillnad) (historik)

á Orminn undir vápn yður. En hverir eigu þau in stóru skip,
er þar liggja út á bakborða Dǫnum?«. »Þar er, segja þeir, Eiríkr
jarl Hákonarson«. Þá svarar Óláfr konungr: »hann mun
þykkjask eiga við oss skapligan fund, ok oss er ván snarprar
orrostu af því liði; þeir eru Norðmenn, sem vér erum«.

K. 105. Uphaf orrostu.

Síðan greiða konungar atróðr, lagði Sveinn konungr sitt
skip móti Orminum langa, en Óláfr konungr sœnski lagði út
frá ok stakk stǫfnum at ýzta skipi Óláfs konungs Tryggvasonar,
en ǫðrum megin Eiríkr jarl. Tóksk þar þá hǫrð orrosta. Sigvaldi
jarl lét skotta við sín skip ok lagði ekki til orrostu. Svá segir
Skúli Þorsteinsson — hann var þá með Eiríki jarli —:

167. Fylgðak Frísa dolgi
(fekk ungr) þars spjǫr sungu
(nú fiðr ǫld, at eldumk)
(aldrbót) ok Sigvalda,
þás til móts við mœti
malmþings í dyn hjalma
sunnr fyr Svǫlðar mynni
sárlauk roðinn bǫ́rum.

Ok enn segir hér frá þessum tíðendum Hallfrøðr:

168. Þar hykk víst til mjǫk mistu
(mǫrg kom drótt á flótta)
gram, þanns gunni framði,
gengis þrœnzkra drengja,
noefr vá einn við jǫfra
allvaldr tváa snjalla
(frægt es til slíks at segja
siðar) en jarl enn þriðja.

K. 106. Flótti Sveins konungs ok Óláfs konungs.

Þessi orrosta var in snarpasta ok allmannskœð. Frambyggjar
á Orminum langa ok Orminum skamma ok Trananum fœrðu
akkeri ok stafnljá í skip Sveins konungs, en áttu vápnin at bera
á þá niðr undir fœtr sér; hruðu þeir ǫll þau skip, er þeir fengu
haldit, en konungrinn Sveinn ok þat lið, er undan komsk, flýði
á ǫnnur skip, ok því næst lǫgðu þeir frá ór skotmáli, ok fór
þessi herr, svá sem gat Óláfr konungr Tryggvason. Þá lagði
þar at í staðinn Óláfr Svía-konungr, ok þegar er þeir kómu
nær stórskipum, þá fór þeim, sem hinum, at þeir létu lið mikit
ok sum skip sín, ok lǫgðu frá við svá búit. En Eiríkr jarl
síbyrði Barðanum við it ýzta skip Óláfs konungs ok hrauð þat
ok hjó þegar þat ór tengslum, en lagði þá at því, er þar var
næst, ok barðisk til þess, er þat var hroðit. Tók þá liðit at
hlaupa af inum smærum skipunum ok upp á stórskipin, en jarl
hjó hvert ór tengslunum, svá sem hroðit var, en Danir ok Svíar
lǫgðu þá í skotmál ok ǫllum megin at skipum Óláfs konungs.

<< prev. page << föreg. sida << >> nästa sida >> next page >>

Project Runeberg, Sun Dec 10 06:24:58 2023 (aronsson) (diff) (history) (download) << Previous Next >> https://runeberg.org/heimskring/0186.html

		Heimskringla. Nóregs Konunga Sogur / 176 (1911) Author: Snorri Sturluson With: Finnur Jónsson Table of Contents / Innehåll \| << Previous \| Next >>
	Project Runeberg \| Catalog \| Recent Changes \| Donate \| Comments? \|