228 (Heimskringla. Nóregs Konunga Sogur)

Full resolution (JPEG) - On this page / på denna sida - K. 1. Uphaf sǫgu ins helga Óláfs konungs

scanned image

<< prev. page << föreg. sida << >> nästa sida >> next page >>

Below is the raw OCR text from the above scanned image. Do you see an error? Proofread the page now!
Här nedan syns maskintolkade texten från faksimilbilden ovan. Ser du något fel? Korrekturläs sidan nu!

This page has been proofread at least once. (diff) (history)
Denna sida har korrekturlästs minst en gång. (skillnad) (historik)

54. Áðr hefk gótt við góða
grams stallara alla
átt, þás ossum drótni,
ógndjarfs, fyr kné hvarfa;
Bjǫrn, fazt opt at arna,
íss, fyr mér at vísa
góðs, meguð gótt of ráða
gunnrjóðr, alls vel kunnuð.

En er þeir riðu upp á Gautland, kvað Sigvatr vísur þessar:

55. Kátr vask opt, þás úti
ǫrðigt veðr á fjǫrðum
vísa segl, í vási,
vindblásit skóf Strinda;
hestr óð kafs at kostum
(kilir hristu men Lista),
út þars eisa létum
undan skeiðr at sundi.

56. Snjalls létum skip skolla
skjǫldungs við ey tjǫlduð
fyr ágætu úti
ǫndurt sumar landi;
en í haust, þars hestar
hagþorns á mó sporna
(tekk ýmissar) Ekkils,
(íðir) hlautk at ríða.

En er þeir riðu upp um Gautland síð um aptan, þá kvað Sigvatr:

57. Jór rennr aptanskœru
allsvangr gǫtur langar;
vǫll kná hófr til hallar
(hǫfum litinn dag) slita;
nú ’s þats blakkr of bekki
berr mik Dǫnum ferri,
fákr laust drengs í díki
(dœgr mœtask nú) fœti.

Þá riða þeir í kaupstaðinn at Skǫrum ok um strætit fram at
garði jarls; hann kvað:

58. Út munu ekkjur líta,
allsnúðula, prúðar
— fljóð séa reyk—, hvar ríðum
Rǫgnvalds í bœ gǫgnum;
keyrum hross, svát heyri
harða langt, at garði,
hesta rǫ́s ór húsum
hugsvinn kona innan.

K. 72. Frá Hjalta ok Óláfi konungi.

Einn hvern dag gekk Hjalti fyrir konung ok skáldin með
honum. Þá tók Hjalti til máls: »svá er, konungr, sem yðr er
kunnigt, at ek em hér kominn á þinn fund ok hefi ek farit langa
leið ok torsótta; en síðan er ek kom yfir hafit ok ek spurða til
tígnar yðarrar, þá þótti mér ófróðligt, at fara svá aptr, at eigi
hefða ek sét yðr ok vegsemð yðra. En þat eru lǫg milli Íslandz
ok Nóregs, at íslenzkir menn, þá er þeir koma til Nóregs, gjalda
þar landaura; en er ek kom yfir haf, þá tók ek við landaurum
allra skipverja minna. En fyrir því at þat veit ek, at þat er
réttast, at þér eiguð þat veldi, er í Nóregi er, þá fór ek á yðarn
fund at fœra yðr landaurana« — sýndi þá konunginum silfrit ok
helti í skaut Gizuri svarta x mǫrkum silfrs. Konungr mælti:
»fáir hafa oss slíkt fœrt um hríð ór Nóregi; vil ek, Hjalti, kunna
yðr þǫkk ok aufúsu fyrir þat, er þér hafið svá mikla stund á lagt

<< prev. page << föreg. sida << >> nästa sida >> next page >>

Project Runeberg, Sun Dec 10 06:24:58 2023 (aronsson) (diff) (history) (download) << Previous Next >> https://runeberg.org/heimskring/0238.html

		Heimskringla. Nóregs Konunga Sogur / 228 (1911) Author: Snorri Sturluson With: Finnur Jónsson Table of Contents / Innehåll \| << Previous \| Next >>
	Project Runeberg \| Catalog \| Recent Changes \| Donate \| Comments? \|