Full resolution (JPEG) - On this page / på denna sida - Uphaf Magnús konungs berfœtts
<< prev. page << föreg. sida << >> nästa sida >> next page >>
Below is the raw OCR text
from the above scanned image.
Do you see an error? Proofread the page now!
Här nedan syns maskintolkade texten från faksimilbilden ovan.
Ser du något fel? Korrekturläs sidan nu!
This page has been proofread at least once.
(diff)
(history)
Denna sida har korrekturlästs minst en gång.
(skillnad)
(historik)
stórgjafar þær, er Hákon konungr hafði gefit bóndum til
vinsælða sér; þótti Magnúsi sín eign gefin engum mun síðr, ok
ýfðisk hugr hans mjǫk við þat, ok þóttisk mishaldinn af við
frænda sinn, er hann skyldi svá miklu minni tekjur hafa, en faðir
hans hafði haft eða forellri, ok kendi Þóri ráðin um. Hákon
konungr ok Þórir urðu þessa varir, ok var uggr á, hver tiltœki Magnús
myndi hafa; þótti þeim þat helzt grunsamligt, er Magnús hafði
á floti langskip tjǫlduð ok búin. Um várit náliga kyndilmessu,
þá lagði Magnús konungr brot á náttarþeli, ok lǫgðu ut tjǫlduðum
skipum ok ljós undir, ok helt út til Hefringar, bjó þar um
nótt, ok gerðu þar elda stóra á landi uppi. Þá hugði Hákon
konungr ok lið þat, er í býnum var, at þat væri gǫrt til svika;
hann lét blása liðinu út, ok sótti allr kaupangslýðr til, ok váru
í samnaði um nóttina. En um morgininn, er lýsa tók, ok Magnús
konungr sá allzherjar lið á Eyrunum, þá helt hann út ór firðinum
ok svá suðr i Gulaþingslǫg. Hákon konungr byrjaði þá ferð
sína ok ætlaði austr í Vík ok átti áðr mót í býnum, talaði þá ok
bað menn vináttu ok hét sinni vináttu ǫllum her, kvað sér skugga
vera um vilja frænda síns, Magnús konungs. Hákon konungr
sat á hesti ok var farbúinn. Allir menn hétu honum vingan með
góðum vilja ok fylgð, ef þyrpti, ok fylgði honum lýðr allr út
undir Steinbjǫrg. Hákon konungr fór upp til Dofrafjallz; en er
hann fór yfir fjallit, reið hann um dag eptir rjúpu nǫkkurri,
er fló undan honum; þá varð hann sjúkr ok fekk banasótt ok
andaðisk þar á fjallinu, ok var lík hans norðr flutt, ok kom
hálfum mánaði síðarr til kaupangs, en hann hafði brot farit;
gekk þá allr bœjarlýðr, ok flestr grátandi, móti líki konungs,
þvíat allir menn unnu honum hugástum. Lík Hákonar konungs
var niðr sett í Kristskirkju. Hákon konungr varð maðr vel
hálfþrítøgr at aldri; hann hefir hǫfðingja verit einn ástsælastr
í Nóregi af alþýðu. Hann hafði farit norðr til Bjarmalandz, átti
þar orrostu ok fekk sigr.
<< prev. page << föreg. sida << >> nästa sida >> next page >>
