- Project Runeberg -  Lesibók /
23

(1911) [MARC] Author: Adrias Christian Evensen
Table of Contents / Innehåll | << Previous | Next >>
  Project Runeberg | Like | Catalog | Recent Changes | Donate | Comments? |   

Full resolution (JPEG) - On this page / på denna sida - Sidor ...

scanned image

<< prev. page << föreg. sida <<     >> nästa sida >> next page >>


Below is the raw OCR text from the above scanned image. Do you see an error? Proofread the page now!
Här nedan syns maskintolkade texten från faksimilbilden ovan. Ser du något fel? Korrekturläs sidan nu!

This page has been proofread at least once. (diff) (history)
Denna sida har korrekturlästs minst en gång. (skillnad) (historik)

Sigurðr svarar: »hverr vill fé hafa alt til ens eina
dags, en eitt sinn skal hverr deyja.« Fáfnir mælti: »fátt
vill þú at mínum dœmum gera, en drukna muntu, ef þú
ferr um sjá úvarliga, ok bíð heldr á landi, unz logn er.«
Ok enn mælti Fáfnir: »Reginn, bróðir minn, veldr mínum
dauða, ok þat hlœgir mik, er hann veldr ok þínum dauða,
ok ferr þá, sem hann vildi.« Enn mælti Fáfnir: »ek bar
œgishjálm yfir öllu fólki, síðan ek lá á arfi míns bróður,
ok svá fnýsta ek eitri alla vega frá mér í brott, at
engi þorði at koma í nánd mér, ok engi vápn hræddumk
ek, ok aldri fann ek svá margan mann fyrir mér, at
ek þœttumk eigi miklu sterkari, en allir váru hræddir
við mik.« Sigurðr mælti: »sá œgishjálmr, er þú sagðir
frá, gefr fám sigr, því at hverr sá, er með mörgum
kemr, má þat finna eitthvert sinn, at engi er einna
hvatastr.« Fáfnir svarar: »þat ræð ek þér, at þú takir
hest þinn ok ríðir á brott sem skjótast, því at þat hendir
opt, at sá, er banasár fær, hefnir sín sjálfr.« Sigurðr
segir: »þetta eru þín ráð, en annat mun ek gera; ek
mun ríða til þíns bóls ok taka þar þat et mikla gull,
er frændr þínir hafa átt.« Fáfnir svarar: »ríða muntu
þar til, er þú finnr svá mikit gull, at œrit er um þína
dnga, ok þat sama gull verðr þinn bani ok hvers annars,
er þat á.« Sigurðr stóð upp ok mælti: »heim munda ek
ríða, þótt ek mista þessa ens mikla fjár, ef ek vissa, at
ek skylda aldri deyja, en hverr frœkn maðr vill fé ráða
alt til ens eina dags; en þú, Fáfnir! ligg í fjörbrotum,
þar er þik Hel hafi;« ok þá deyr Fáfnir.

Eptir þetta kom Reginn til Sigurðar ok mælti:
»heill, herra minn! mikinn sigr hefir þú unnit, er þú
hefir drepit Fáfni, er engi varð fyrr svá djarfr at á
hans götu þorði sitja, ok þetta fremðarverk mun uppi,
meðan veröldin stendr.« Nú stendr Reginn ok sér niðr
í jörðina langa hríð; ok þegar eptir þetta mælti hann
af miklum móði: »bróður minn hefir þú drepit; ok
varla má ek þessa verks saklauss vera.« Nú tekr Sigurðr
sitt sverð Gram ok þerrir á grasinu, ok mælti til
Regins: »fjarri gekktu þá, er ek vann þetta verk, ok ek
reynda þetta snarpa sverð með minni hendi, ok mínu
afli atta ek við orms megin, meðan þú látt í einum
lyngrunni, ok vissir þú eigi, hvárt er var himinn eða
jörð.« Reginn svarar: »þessi ormr mætti lengi liggja
í sínu bóli, ef eigi hefðir þú notit sverðs þess, er ek

<< prev. page << föreg. sida <<     >> nästa sida >> next page >>


Project Runeberg, Sat Dec 21 12:26:56 2019 (aronsson) (diff) (history) (download) << Previous Next >>
http://runeberg.org/lesibok/0037.html

Valid HTML 4.0! All our files are DRM-free