Full resolution (TIFF) - On this page / på denna sida - Bandamanna saga
<< prev. page << föreg. sida << >> nästa sida >> next page >>
Below is the raw OCR text
from the above scanned image.
Do you see an error? Proofread the page now!
Här nedan syns maskintolkade texten från faksimilbilden ovan.
Ser du något fel? Korrekturläs sidan nu!
This page has been proofread at least once.
(diff)
(history)
Denna sida har korrekturlästs minst en gång.
(skillnad)
(historik)
„þat er og nú eigi vélar; þú sér hvers þér missið
í fénu“ — vindr upp sjóðnum, ok hellir silfrinu
í kné honum, ok hefir í höndina ok tjár
fyrir honum — „ok hér eru nú tvau hundruð
silfrs, er ek vil at þú hafir til þess at (þú)
gangir eigi í mót málinu, því at þér einum ann
ek góðs hlutar af þeim sem hér eigu hlut í.
Enn ek veit, at þú ert svá vitr maðr, at þú
munt sjá kunna, at þér er betra at þiggja
sæmdar hlut, enn hafa alls ekki af sem aðrir
munu“. Egill segir: „Þat ætla ek, at þú sért
enn versti karl; ætlar þú at ek muna ganga á
eiða mína við fégjafir þínar“. Ófeigr segir:
„Eigi beiði ek þess, at þú haldir eigi eiða
þína; hafið þér eigi svá mælt, at annathvárt
skuluð þér fyrir hafa sektir eða sjálfdæmi. Nú
mætti svá vera, at svá kæmi málinu Odds, at
oss frændum væri þess af unt, at bandamenn
tæki sjálfdæmi, ok ef sjálfdæmit verðr yðr selt,
enda bæri svá til, at þú verðir um at gera, þá
hefir þú þess eigi svarit, hve mikit þú skyldir
gera, eða hve lítit. Nú mættir þú svá stilla,
at þat væri sómi, er þú gerðir, ok heldr þú þá
svardaga þína, enda hefir þú af mér þökkina“.
Egill segir: „Allslægr karl ertu; sé ek at svá
má vera sem þú segir, enn eigi ber ek þrek
til einn at ganga í mót þessum öllum“. Ófeigr
segir: „Hversu mun þá, ef ek fæ annan til at
koma í málit með þér; viltu þá til ráða?“
<< prev. page << föreg. sida << >> nästa sida >> next page >>
