Full resolution (JPEG)
- On this page / på denna sida
- Hér hefr upp sǫgu Óláfs konungs Tryggvasonar
<< prev. page << föreg. sida << >> nästa sida >> next page >>
Below is the raw OCR text
from the above scanned image.
Do you see an error? Proofread the page now!
Här nedan syns maskintolkade texten från faksimilbilden ovan.
Ser du något fel? Korrekturläs sidan nu!
This page has been proofread at least once.
(diff)
(history)
Denna sida har korrekturlästs minst en gång.
(skillnad)
(historik)
Hákon jarl helt liði þessu ǫllu suðr um Stað. Þá spurði hann,
at Ragnfrøðr konungr með her sinn væri farinn inn í Sogn, snøri
þá þannug sínu liði, ok varð þar fundr þeira Ragnfrøðar.
Lagði jarl skipum sínum at landi ok haslaði vǫll Ragnfrøði
konungi ok tók orrostustað; svá segir í Velleklu:
124. Varð fyr Venða myrði,
víðfrægt en, gramr, síðan
gerðisk mest at morði
mannfall, við styr annan;
hlymnarfi bað hverfa
hlífar flagðs, ok lagði
jalks við ǫndurt fylki
ǫndur »fǫrf«, at landi.
Þar varð allmikil orrosta. Hafði Hákon jarl lið miklu meira ok
fekk sigr. Þetta var á Þinganesi, þar er mœtisk Sogn ok
Hǫrðaland. Ragnfrøðr konungr flýði til skipa sinna, en þar fell af
liði hans ccc. manna; svá segir i Velleklu:
125. Strǫng varð gunnr, áðr gunnar
gammi nás und hramma
þrøngvimeiðr of þryngvi
þrimr hundruðum lunda,
knátti hafs at hǫfðum
(hagnaðr vas þat) bragna
folkeflandi fylkir
fangsæll þaðan ganga.
Eptir orrostu þessa flýði Ragnfrøðr konungr ór Nóregi, en
Hákon jarl friðaði land ok lét fara aptr norðr her þann inn
mikla, er honum hafði fylgt um sumarit, en hann dvalðisk þar
um haustit ok um vetrinn.
K. 19. Kvánfang Hákonar jarls.
Hákon jarl gekk at eiga konu þá, er hét Þóra, dóttir Skaga
Skoptasonar, ríks mannz. Þóra var allra kvinna fríðust; þeira
synir váru Sveinn ok Hemingr; Bergljót hét dóttir þeira, er
síðan átti Einarr þambarskelfir. Hákon jarl var kvinnamaðr
mikill ok átti mǫrg bǫrn. Ragnhildr hét dóttir hans; hana gipti
hann Skopta Skagasyni, bróður Þóru. Jarl unni Þóru svá mikit,
at hann gerði sér svá miklu kærri, en aðra menn, frændr Þóru,
ok var þó Skopti, mágr hans, mest metinn af ǫllum frændum
hennar. Jarl veitti honum stórar veizlur á Mœri. En hvert sinn
er þeir váru i leiðangri, þá skyldi Skopti leggja skip sitt næst
skipi jarls, en engum skyldi þat hlýða, at leggja skip milli
skipa þeira.
K. 20. Fall Tíðenda-Skopta.
Þat var á einu sumri, er Hákon jarl hafði leiðangr úti, þá
stýrði þar skipi með honum Þorleifr spaki. Eiríkr var ok þar í
fǫr; var hann þá x. vetra eða xi. En er þeir lǫgðu til hafnar á
<< prev. page << föreg. sida << >> nästa sida >> next page >>
Project Runeberg, Sun Dec 10 06:24:58 2023
(aronsson)
(diff)
(history)
(download)
<< Previous
Next >>
https://runeberg.org/heimskring/0127.html
