Full resolution (JPEG) - On this page / på denna sida - Hér hefr upp sǫgu Óláfs konungs Tryggvasonar
<< prev. page << föreg. sida << >> nästa sida >> next page >>
Below is the raw OCR text
from the above scanned image.
Do you see an error? Proofread the page now!
Här nedan syns maskintolkade texten från faksimilbilden ovan.
Ser du något fel? Korrekturläs sidan nu!
This page has been proofread at least once.
(diff)
(history)
Denna sida har korrekturlästs minst en gång.
(skillnad)
(historik)
K. 69. Kristnaðr Þrándheimr.
Óláfr konungr gengr nú í hofit ok fáir menn með honum
ok fáir af bóndum; en er konungr kom þar, sem goðin váru, þá
sat þar Þórr ok var mest tígnaðr af ǫllum goðum, búinn með
gulli ok silfri. Óláfr konungr hóf upp refði gullbúit, er hann
hafði í hendi, ok laust Þór, svá at hann fell af stallinum; síðan
hljópu at konungsmenn ok skýfðu ofan ǫllum goðum af stǫllunum;
en meðan konungr var inni í hofinu, þá var drepinn Járnskeggi
úti fyrir hofsdurunum ok gerðu þat konungsmenn. En en
konungr kom til liðsins, þá bauð hann bóndum ii. kosti, annan
þann, at þeir skyldu þá allir við kristni taka, en at ǫðrum
kosti halda við hann bardaga, en eptir lát Skeggja, þá varð engi
forgangsmaðr at í bónda liði, at reisa merki í móti Óláfi
konungi; varð hinn kostr upp tekinn at ganga til konungs ok hlýða
því, er hann bauð. Þá lét Óláfr konungr skíra fólk alt þat, er
þar var, ok tók gíslar af bóndum til þess, at þeir skyldu halda
kristni sína. Síðan lét Óláfr konungr fara menn sína um ǫll
fylki í Þrándheimi, mælti þá engi maðr í móti kristninni; var
þá skírt þar alt fólk í Prœndalǫgum.
K. 70. Bœjargørð.
Óláfr konungr fór liði sínu út til Niðaróss; þá lét hann reisa
þar hús á Niðar-bakka ok skipaði svá, at þar skyldi vera
kaupstaðr, gaf mǫnnum þar toptir til at gera sér þar hús, en
hann lét gera konungsgarð upp frá Skipakrók. Lét hann þannug
flytja um haustit ǫll fǫng þau, er þurpti til vetrsetu, ok hafði
hann þar allmikit fjǫlmenni.
K. 71. Kvánfang Óláfs konungs.
Óláfr konungr gerði stefnulag frændum Járnskeggja ok
bauð þeim bœtr, en þar váru til svara margir gǫfgir menn;
Járnskeggi átti dóttur, er Guðrún er nefnd; kom þat at lykðum
í sáttmál þeira, at Óláfr konungr skyldi fá Guðrúnar. En er
brullaupsstefna sú kom, þá gengu þau í eina rekkju, Óláfr
konungr ok Guðrún. En ina fyrstu nótt, er þau lágu bæði samt,
þegar konungr var sofnaðr, þá brá hon knífi ok vill leggja á
honum. En er konungr varð þessa varr, tók hann knífinn frá
henni ok stóð upp ór hvílunni ok gekk til manna sinna ok segir,
hvat orðit hafði. Tók Guðrún þá ok klæði sín ok allir þeir menn,
<< prev. page << föreg. sida << >> nästa sida >> next page >>
