Full resolution (JPEG) - On this page / på denna sida - Hér hefr upp sǫgu Óláfs konungs Tryggvasonar
<< prev. page << föreg. sida << >> nästa sida >> next page >>
Below is the raw OCR text
from the above scanned image.
Do you see an error? Proofread the page now!
Här nedan syns maskintolkade texten från faksimilbilden ovan.
Ser du något fel? Korrekturläs sidan nu!
This page has been proofread at least once.
(diff)
(history)
Denna sida har korrekturlästs minst en gång.
(skillnad)
(historik)
K. 97. Ferð Óláfs konungs.
Óláfr konungr fór með liði sínu suðr með landi; sóttu þá til
fundar við hann vinir hans margir, ríkismenn þeir, er til ferðar
váru búnir með konungi; var þar inn fyrsti maðr Erlingr
Skjálgsson, mágr hans, ok hafði hann skeið ina miklu; hon var
xxx. at rúmatali, ok var þat skip allvel skipat. Þá kómu ok til
konungs mágar hans, Hyrningr ok Þorgeirr, ok stýrði hvártveggi
miklu skipi. Margir aðrir rikismenn fylgðu honum; hann hafði
lx. langskipa, er hann fór ór landi, ok siglði suðr fyrir Danmǫrk
gǫgnum Eyrarsund, ok í þeiri ferð kom Óláfr konungr til
Vindlandz ok gerði stefnulag við Búrizláf konung, ok funnusk þeir
konungar; tǫluðu þeir þá um eignir þær, er Óláfr konungr heimti,
ok fóru allar rœður líkliga milli konunga, ok var góðr greiðskapr
um þær heimtingar, er Óláfr konungr þóttisk þar eiga. Dvalðisk
Óláfr konungr þar lengi um sumarit, fann þar marga vini sína.
K. 98. Frá Svía-konungi.
Sveinn konungr tjúguskegg átti þá Sigríði ina stórráðu, sem
fyrr er ritit. Sigríðr var inn mesti óvin Óláfs konungs
Tryggvasonar ok fann þat til saka, at Óláfr konungr hafði slitit
einkamálum við hana ok lostit hana í andlit, svá sem fyrr var ritit. Hon
eggjaði mjǫk Svein konung til at halda orrostu við Óláf konung
Tryggvason ok segir, at þat var œrin sǫk við Óláf konung, er
hann hafði lagzk hjá Þyri, systur hans — »at ólofi yðru, ok
myndi ekki inir fyrri frændr yðrir slíkt þola«; hafði Sigríðr
drótning slikar fortǫlur optliga í munni, ok kom hon svá sínum
fortǫlum, at Sveinn konungr var fullkominn at gera þat ráð. Ok
snimma um várit sendi Sveinn konungr menn austr í Sviþjóð á
fund Óláfs Svía-konungs, mágs síns, ok Eiríks jarls, ok lét segja
þeim, at Óláfr Nóregskonungr hafði leiðangr úti ok ætlaði at
fara um sumarit til Vindlandz; fylgði þat orðsending, at
Svíakonungr ok jarl skyldu her úti hafa ok fara til móts við Svein
konung; skyldu þeir þá allir saman leggja til orrostu við Óláf
konung. En Svía-konungr ok Eiríkr jarl váru þessarrar ferðar
albúnir ok drógu þá saman skipaher mikinn af Svíaveldi; fóru
því liði suðr til Danmerkr ok kómu þar svá, at Óláfr konungr
Tryggvason hafði áðr austr siglt; þess getr Haldórr ókristni,
er hann orti um Eirík jarl:
<< prev. page << föreg. sida << >> nästa sida >> next page >>
