Full resolution (JPEG)
- On this page / på denna sida
- K. 1. Uphaf sǫgu ins helga Óláfs konungs
<< prev. page << föreg. sida << >> nästa sida >> next page >>
Below is the raw OCR text
from the above scanned image.
Do you see an error? Proofread the page now!
Här nedan syns maskintolkade texten från faksimilbilden ovan.
Ser du något fel? Korrekturläs sidan nu!
This page has been proofread at least once.
(diff)
(history)
Denna sida har korrekturlästs minst en gång.
(skillnad)
(historik)
gekk þar af skipum; fór þá upp um Orkadal alt til fjallz ok
austr yfir fjall til Dala. Frá þessu er sagt, at Sveinn jarl
brendi bœ í Niðarósi, í flokki þeim, er ortr er um Klœng
Brúsason:
37. Brunnu allvalds inni
— eldr hykk at sal feldi —
(eimr skaut á her hrími)
halfǫr við Nið sjalfa.
K. 45. Frá Óláfi konungi.
Óláfr konungr fór þá suðr eptir Guðbrandzdǫlum ok þaðan
út á Heiðmǫrk, fór alt at veizlum um hávetri, en dró saman her,
er váraði, ok fór út í Víkina; hann hafði mikit lið af Heiðmǫrk,
er konungar fengu honum; fóru þaðan lendir menn margir; í
þeiri ferð var Ketill kálfr á Hringunesi; Óláfr konungr hafði
ok lið af Raumaríki. Sigurðr konungr sýr, mágr hans, kom til
liðs við hann með mikla sveit manna; sœkja þeir þá út til sjávar
ok ráða sér til skipa ok búask innan ór Víkinni; þeir hǫfðu
fritt lið ok mikit. En er þeir hǫfðu búit lið sitt, lǫgðu þeir
út til Túnsbergs.
K. 46. Frá liði Sveins jarls.
Sveinn jarl samnar liði alt um Þrándheim þegar eptir jólin
ok býðr út leiðangri, býr ok skipin. Í þenna tima var í Nóregi
fjǫlði lendra manna; óru þeir margir ríkir ok svá ættstórir,
at þeir váru komnir af konunga ættum eða jarla ok áttu skamt
til at telja, váru ok stórauðgir. Var þar alt traust konunganna
eða jarlanna, er fyrir landi réðu, er lendir menn váru; þvíat svá
var í hverju fylki, sem lendir menn réðu fyrir bóndaliðinu. Vel
var Sveinn jarl vingaðr við lenda menn; varð honum gott til
liðs. Einarr þambarskelfir, mágr hans, var með honum ok margir
aðrir lendir menn ok margir þeir, er áðr um vetrinn hǫfðu
trúnaðareiða svarit Oláfi konungi bæði lendir menn ok bœndr. Þeir
fóru þegar ór firðinum, er þeir váru búnir, ok heldu suðr með
landi ok drógu at sér lið ór hverju fylki. En er þeir kómu
suðr fyrir Rogaland, þá kom til móts við þá Erlingr Skjálgsson
ok hafði mikit lið, ok með honum margir lendir menn; heldu
þá ǫllu liðinu austr til Víkr; þat var, er á leið langafǫstu, er
Sveinn jarl sótti inn í Víkina. Jarl helt liðinu inn um Grenmar
ok lagðisk við Nesjar.
<< prev. page << föreg. sida << >> nästa sida >> next page >>
Project Runeberg, Sun Dec 10 06:24:58 2023
(aronsson)
(diff)
(history)
(download)
<< Previous
Next >>
https://runeberg.org/heimskring/0218.html
