Full resolution (JPEG) - On this page / på denna sida - K. 1. Uphaf sǫgu ins helga Óláfs konungs
<< prev. page << föreg. sida << >> nästa sida >> next page >>
Below is the raw OCR text
from the above scanned image.
Do you see an error? Proofread the page now!
Här nedan syns maskintolkade texten från faksimilbilden ovan.
Ser du något fel? Korrekturläs sidan nu!
This page has been proofread at least once.
(diff)
(history)
Denna sida har korrekturlästs minst en gång.
(skillnad)
(historik)
ok varð fǫlr sem nár, ok fellusk honum hendr. Konungr fann á
honum hræzlu ok mælti: »hvat er nu, Sveinn? viltu svikja
mik?«. Sveinn kastaði yfirhǫfninni frá sér ok saxinu ok feil til
fóta konungi ok mælti: »alt á guðs valdi ok yðru, konungr«.
Konungr bað menn sina taka Svein, ok var hann i járn settr.
Þá lét konungr fœra sæti Hrœreks á annan pall; en hann gaf
grið Sveini, ok fór hann af landi í brot. Konungr fekk þá
Hrœreki annat herbergi at sofa í, en þat er hann svaf sjálfr í;
svaf í því herbergi mart hirðmanna; hann fekk til ii. hirðmenn
at fylgja Hrœreki dag ok nótt; þeir menn hǫfðu lengi verit með
Óláfi konungi, ok hafði hann þá reynt at trúleik við sik; ekki er
þess getit, at þeir væri ættstórir menn. Hrœrekr konungr gerði
ýmist, at hann þagði marga daga, svá at engi maðr fekk orð af
honum, en stundum var hann svá kátr ok glaðr, at þeim þótti at
hverju orði gaman, því er hann mælti; en stundum mælti hann
mart ok þó ilt einu; svá var ok, at stundum drakk hann hvern
af stokki ok gerði alla ófœra, er nær honum váru, en optast
drakk hann lítit. Óláfr konungr fekk honum vel skotsilfr. Opt
gerði hann þat, þá er hann kom til herbergis, áðr hann lagðisk
til svefns, at hann lét taka inn mjǫð, nǫkkurar byttur, ok gaf at
drekka ǫllum herbergismǫnnum; af því varð hann þokkasæll.
K. 82. Frá Finni lítla.
Maðr er nefndr Fiðr lítli, uplenzkr maðr, en sumir segja, at
hann væri finzkr at ætt; hann var allra manna minztr ok allra
manna fóthvatastr, svá at engi hestr tók hann á rás; hann kunni
manna bezt við skið ok boga; hann hafði lengi verit þjónostumaðr
Hrœreks konungs ok farit opt ørenda hans, þeira er trúnaðar
þurpti við; hann kunni vega um ǫll Uplǫnd; hann var ok
málkunnigr þar ǫllu stórmenni. En er Hrœrekr konungr var tekinn
í fára gæzlu, þá slósk Finnr í fǫr þeira, ok fór hann optast í sveit
með knǫpum ok þjónostumǫnnum, en hvert sinn er hann mátti,
kom hann til þjónostu við Hrœrek konung ok opt í tal, ok vildi
konungr skǫmmum samfast mæla við hann ok vildi ekki gruna
láta tal þeira. En er á leið várit ok þeir sóttu út í Vikina, þá
hvarf Fiðr í brot frá liðinu nǫkkura daga; þá kom hann enn
aptr ok dvalðisk um hríð. Sva fór opt fram, ok var at því engi
gaumr gefinn, þvíat margir váru umrenningar með liðinu.
<< prev. page << föreg. sida << >> nästa sida >> next page >>
