Full resolution (JPEG) - On this page / på denna sida - Johan Columbus
<< prev. page << föreg. sida << >> nästa sida >> next page >>
Below is the raw OCR text
from the above scanned image.
Do you see an error? Proofread the page now!
Här nedan syns maskintolkade texten från faksimilbilden ovan.
Ser du något fel? Korrekturläs sidan nu!
This page has never been proofread. / Denna sida har aldrig korrekturlästs.
Gratia coelestis Sveonum, quae gaudia, genti,
Quas spes attulerit, magnarum limina rerum.
Horrida commendant redeuntem nubila solem,
Pulsaque nox animis renovat majora solutis
Gaudia. Sic nuper post sævi tempora Martis
Jam furor armorum facibusque instincta cruentis
Ira, hominum tristi tabo satiata, refrixit;
Terruit ipsa mali facies, monstrisque repertis
In sese rabidi creverunt tædia ludi,
Cum tandem, flexis ad mitia mentibus, ægras
Respicit e cælo propior Clementia terras,
Motaque tot poenis, sibi quas acciverat ultro
Erratrix natura hominum, male prodiga recti,
Et miserata, vocat fratrem fratrisque ministram,
Quæ minor ex una crescebat origine, Pacem.
Excitus augustæ nutu verbisque sororis,
Paret et adstat Amor: non quem vulgata profanat
Fabula ludentem facibus nec honesta moventem
Spicula, sed coelo dignus, quo vindice quondam
Dira recessit Eris, quo Nox victore fugata
Et faux Tartarei coiit sinuosa profundi.
Consulit hic fessis mortalibus eque ruinis
Vix sibi constantes animos retrahitque tenetqne,
Insuescens auris, ne stricto incurrere ferro,
Neve graves dominis properent armare dolores.
At Mars conversus notæ remoramine vocis
Interjungit equos positoque in litore curru
Lentus Acidaliis agitat convivia lucis.
Protinus accelerat Pax candida; tempore capto
Pugnarum memores animos sopire laborat,
Mulcet ab illatis redeuntes cladibus iras,
Dedocet in partes niti studiumque doloris
Reddendi minuit, ne fors arma aspera longis
Pertendant odiis utrasque absumere vires,
Omniaque involvat gravibus Bellona ruinis.
His jubet ardorem succedere vera parandi
Gaudia, majorumque lares et dulcia quemque
Pignora cumque suis genialia rura colonis
Visere, jura sequi, rem quærere remque tueri
Artibus innocuis et prosperiore Minerva.
Jam situs amotos rubigine deterat enses,
Machinaque utilibus Mavortia cedat aratris.
<< prev. page << föreg. sida << >> nästa sida >> next page >>
