sithan af thissum thrim aucathis fulc j gutlandi som mikit um langan tima at land elptj thaim ai alla fytha tha lutathu thair bort af landi huert thrithia thiauth so at alt sculdu thair aiga oc mith sir bort hafa som thair vfan iorthar attu. Sithan wildu thair nauthugir bort fara men foru innan thors borg Oc bygthus thar firir. sithan wildi ai land thaim thula vtan racu thaim bort thethan. Sithan foru thair borth i faroyna. Oc bygthus thar firir thar gatu thair ai sic vppi haldit Vtan foru j aina oy withr aistland sum haitir dagaithi. Oc bygthus thar firir Oc gierthu burg aina som enn synis. thar gatu thair oc ai sic haldit. Vtan foru vpp at watnj thi sum haitir dyna
Oc vpp ginum ryza land so fierri foru thair at thair quamu til
griclanz. thar baddus thair byggias firir af grica kunungi. vm. ny.
oc nithar kunungr thann lufathi thaim Oc hugthi at ai mith ann manathr
wari. sithan gangnum manathi wildi hann thaim bort wisa En thair
annsuarathv at ny oc nithar wari e oc e Oc quathu so sir wara lufat.
thissun thaira withratta quam firir drytningina vm sithir tha segthi
han. Minn herra kunungur thu lufathi thaim byggia vm ny. oc nithar.
tha ir thet e oc e tha matt thu ai af thaim taka. So bygthus thair
thar firir. oc enn byggia oc enn hafa thair sumt af waru mali
