Full resolution (TIFF) - On this page / på denna sida - Bandamanna saga
<< prev. page << föreg. sida << >> nästa sida >> next page >>
Below is the raw OCR text
from the above scanned image.
Do you see an error? Proofread the page now!
Här nedan syns maskintolkade texten från faksimilbilden ovan.
Ser du något fel? Korrekturläs sidan nu!
This page has been proofread at least once.
(diff)
(history)
Denna sida har korrekturlästs minst en gång.
(skillnad)
(historik)
Egill segir: „Eigi skal synja þér tals“ — ok
settist niðr. Ófeigr mælti: „Ertu búmaðr, Egill?“
„Svá er“, segir hann. „Býr þú á Borg í Borgarfirði?“
segir Ófeigr. „Þar bý ek“, segir Egill.
Ófeigr mælti: „Vel er þér farit, at frásögn“,
segir Ófeigr, „at þú sért mikilmenni ok garpr
ok góðr af fénu, enn mæla þat sumir menn, at
vit séum nökkut skaplíkir, hvárrtveggi maðr
ekki fémikill, enn þykkir gott at veita vinum
sínum“. Egill mælti: „Vel þætti mér, at ek
væra þér líkr, enn þar sem þú ræðir, at ek sé
ekki fémikill, þar hyggjum vér nú brátt til
annars, eða hve fémikill maðr er Oddr? þú
munt gerla vita“. Ófeigr segir: „Sagðir þú at
vit þyrftum ekki þar um at ræða, enn kunnigt
er mér um fé hans, ok eigi mun þar meira
frá sagt enn er, eða er þér nökkur forvitni á,
hve mikit þú munt hljóta af fénu?“ Egill segir:
„Þar er mér allmikil forvitni á, ok ertu góðr karl“.
„Þat ætla ek“, segir Ófeigr, „at þú munt hljóta
enn sextánda hlut ór Mels landi“. Egill mælti:
„Ekki þykki mér hann þá svá auðigr sem þú
sagðir“. Ófeigr segir: „Ekki er þat, aldregi
skortir hann auð; þetta muntu af hljóta fénu;
hafið þér eigi svá mælt, at þér skyldið hafa
helming fjárins, er þér bjugguð málit til, enn
fjórðungsmenn hálft, er sektarfé eigu taka at
lögum. Þá telst mér sem þú munir eiga enn
sextánda hlut í Melslandi, ef þér eruð átta.
<< prev. page << föreg. sida << >> nästa sida >> next page >>
