350 (Heimskringla. Nóregs Konunga Sogur)

Full resolution (JPEG) - On this page / på denna sida - K. 1. Uphaf sǫgu ins helga Óláfs konungs

scanned image

<< prev. page << föreg. sida << >> nästa sida >> next page >>

Below is the raw OCR text from the above scanned image. Do you see an error? Proofread the page now!
Här nedan syns maskintolkade texten från faksimilbilden ovan. Ser du något fel? Korrekturläs sidan nu!

This page has been proofread at least once. (diff) (history)
Denna sida har korrekturlästs minst en gång. (skillnad) (historik)

lagði til orrostu, þar er herr mikill var fyrir, en Danir þørði
þá eigi at berjask; vissi konungr ok, at í her Knúts konungs var
fjǫlði Norðmanna. Grunaði konung, at þeir, er slíkt réðu honum,
mundu vera hollari Knúti konungi en honum. Veitti Óláfr
konungr þá órskurð, segir svá, at menn skulu búask, þeir er honum
vilja fylgja, ok fara landveg um it øfra Gautland ok svá til
Nóregs — »en skip vár, segir hann, ok allan þunga, þann er vér
megum eigi eptir oss flytja, vil ek senda austr í veldi
Svíakonungs ok láta þar varðveita oss til handa«.

K. 158. Ferð Háreks ór Þjóttu.

Hárekr ór Þjóttu svarar máli Óláfs konungs, segir svá: »þat
er auðsætt, at eigi má ek fara fœti til Nóregs; ek em maðr gamall
ok þungr ok vanr lítt gǫngum; ætla ek trauðr at skiljask við
skip mitt; hefi ek lagt þá stund á um skip þat ok búnað þess,
at mér mun leitt, at ljá óvinum mínum fangs á skipi því«.
Konungr svarar: »far þu með oss, Hárekr, vér skulum bera þik
eptir oss, ef þú mátt eigi ganga«. Hárekr kvað þá vísu:

102. Ráðit hefk at riða,
Rínleygs, heðan mínum
láðs dynmari, leiðir
lǫngum heldr an ganga,
þótt, leggfjǫturs, liggi,
lundr, í Eyrarsundi
(kann þjóð kerski minni)
Knútr herskipum úti.

Þá lét Óláfr konungr búa ferð sína; hǫfðu menn ígangsklæði sín
ok vápn, ok þat, sem feksk af reiðskjótum, þá var klyfjat af
klæðum ok lausafé. En hann sendi menn ok lét flytja skip sín
austr í Kalmarnir; létu þeir þar upp setja skipin ok flytja reiða
allan ok annan varnað til varðveizlu. Hárekr gerði sem hann
hafði sagt, at hann beið byrjar ok siglði síðan austan fyrir Skáni,
til þess er hann kom austan at Hǫlunum, ok var þat aptan dags,
en byrr var á blásandi. Þá lét hann ofan leggja seglit ok svá
viðu, taka ofan veðrvitann ok sveipa skipit alt fyrir ofan sjá með
grám tjǫldum ok lét róa í nǫkkurum rúmum fram ok aptr, en lét
fiesta menn sitja lágt í skipinu; ok sá varðmenn Knúts konungs
skipit ok rœddu um sín í milli, hvat skipa þat myndi vera, ok
gátu þess, at vera myndi flutt salt eða síld, er þeir sá fá mennina
en lítinn róðrinn, en skipit sýndisk þeim grátt ok bráðlaust ok
sem skipit myndi skinit af sólu, ok sá þeir, at skipit var sett
mjǫk. En er Hárekr kom fram í sundit ok um herinn, þá lét
hann reisa viðuna ok draga seglit, lét setja upp gylta veðrvita;
var seglit hvítt sem dript ok stafat rauðu ok blá með vendi. Þá

<< prev. page << föreg. sida << >> nästa sida >> next page >>

Project Runeberg, Sun Dec 10 06:24:58 2023 (aronsson) (diff) (history) (download) << Previous Next >> https://runeberg.org/heimskring/0360.html

		Heimskringla. Nóregs Konunga Sogur / 350 (1911) Author: Snorri Sturluson With: Finnur Jónsson Table of Contents / Innehåll \| << Previous \| Next >>
	Project Runeberg \| Catalog \| Recent Changes \| Donate \| Comments? \|