Annotationes criticae in Truculentum Plauti. 109 Stratophani, num Phronesium pepererit roganti, Astaphium respondet (uu. 500 sqq.): Péperit puerum nímium lepidum. Stratophanes. Ehem, écquid mei similést? Astaphium. Rogas? Quíne ubi natúst machaeram et clúpeum poscebát sibi? Stratophanes. Méus est; scio iam de árgumentis. Nímium quidem similést, papae. In u. 502 Bothio auctore plerique editores Nimium quidem similest Astaphio dederunt, uix recte, nam etiam in Terent. Eunuch. 416 papae in fine sententiae positum est: Pulcherrume hercle dictum et sapienter, papae. Mox Phronesium, ubi sit Astaphium, his uerbis rogat (u. 508): Úbi illa obsecróst, quae me hic relíquit? eabse abisti. Exitum uitiatum Ussingius sic refinxit: ubi ea se abstulit? collato Rud. 1019, sed quo, non ubi scriptum oportuit. Melius Buechelerus quid ea a me abstitit? coniecit. Propius tamen a scriptura codicum hoc¢ erit: Úbi illa obsecróst, quae me hic relíquit et eapse ábstitit ? Stratophanes Phronesio duas ancillas, quas ex Syria adduxit, donat (uu. 528 sq.): Hís te dono. Phronesium. Paénitetne té, quot ancillás alam, Quín etiam insuper adducas, quaé mihi comedínt cibum? Lacuna posterioris uersus sic facillime expletur: Quín etiam insuper hás adducas, quaé mihi comedínt cibum?